बाबा , मला तुमच्यासारखे कधीच नाय व्हायचं
*बाबा , मला तुमच्यासारखे कधीच नाय व्हायचं !*
अगदी जेव्हापासून कळू लागले ना!
हो अगदी तेव्हापासून मी नेहमी म्हणायचो ,
बाबा , मला तुमच्यासारखे कधीच नाय व्हायचं !
तुम्ही खूप साधे (कदाचित गबाळेच म्हणा) राहायचे ,
अगदी साध्या साध्या गोष्टींवर खर्च करताना ,सतत नाही म्हणायचे !
म्हणूनच मी नेहमी म्हणायचो
बाबा , मला तुमच्यासारखे कधीच नाय व्हायचं !
तुमची प्रत्येक कृती मला चुकीचीच वाटायची!
तुम्ही लावत असलेली शिस्त मला खूप कडक वाटायची !
म्हणूनच मी नेहमी म्हणायचो
बाबा , मला तुमच्यासारखे कधीच नाय व्हायचं !
तुम्ही नोकरी करताना खूपच प्रामाणिक होता!
तुम्ही कधीही तत्व सोडले नाही , म्हणूनच तर आपण गरीबच राहिलो!
म्हणूनच मी नेहमी म्हणायचो
बाबा , मला तुमच्यासारखे कधीच नाय व्हायचं !
आज मी आता बाबा झालोय !
तसे बाबा! खूप साऱ्या प्रश्नांचे मोहोळ उठलेय सभोवती !
तुम्ही अनेकांचे आदर्श झाला होतात!
मला आज निदान माझ्या मुलांचे तरी आदर्श होता येईल का खरंच ?
नक्की सांगता येत नाही !
आज मी तुमच्या भूमिकेत आलोय!
तरीही अजून मी तेच का म्हणतोय
बाबा , मला तुमच्यासारखे कधीच नाय व्हायचं !
पण आताशा हे खूप जड जातेय हो बाबा!
हे कबूल करणे की तुम्ही किती बरोबरच होता !
कारण आज तुमचा चष्मा मी घातलाय !
तुम्ही शून्यातून किती गोष्टी घडविल्या !
सगळ्यात महत्त्वाचे तुम्ही निर्माण केले उत्तम चारित्र्य !
त्याची किंमत आज कळते आहे !
म्हणूनच आज मी म्हणतोय ,
बाबा खरंच तुमच्यासारखे मला थोडेतरी होता येईल का हो?
बाबा खरंच तुमच्यासारखे थोडेतरी होता येईल का हो?
© हेमंत सांबरे
१७.०३.२०२१.
{ कविता आवडल्यास पुढे पाठवू शकता }
ZakaaaaS
ReplyDelete