Esrael, Mosad and Rest World ! इस्रायल , मोसाद व बाकीचे जग !- हेमंत सांबरे

*इस्रायल , मोसाद व बाकीचे जग !* 

मोसाद हे नाव ऐकले नाही असा एकही वाचक मिळणे विरळा आहे . मोसाद म्हणजे इस्रायल नावाच्या छोट्या पण अत्यंत शक्तिशाली देशाची गुप्तहेर संस्था आहे . मोसादने स्वतःच्या देशाच्या रक्षणासाठी  अशक्यप्राय वाटणारी अनेक कामे करून दाखवली आहेत . तसा अवघा इस्रायल देश व त्यांचे नागरीक " *राष्ट्र प्रथम* " या तत्त्वावर चालतात , म्हणूनच त्यांना एखाद्या उघड युद्धात हरवणे अशक्यप्राय आहे . 

अलीकडेच काही दिवसांपूर्वी हमास या दहशतवादी संघटनेने इस्रायल वर अमानुष हल्ला करत , अनेकांना क्रूरपणे ठार केले , अनेक महिला व लहान मुलांना ही त्यांनी सोडले नाही . या हल्ल्याच्या निमित्ताने इस्रायल- पॅलेस्टाईन संघर्ष व त्याची चर्चा पुन्हा जगाच्या पटलावर सुरू झाली . 

अलीकडेच रुपाली भुसारी लिखित " दहशतवादाच्या विरोधात इस्रायल" हे अतिशय उत्तम पुस्तक माझ्या वाचनात आले . एकूण वीस प्रकरणे असलेल्या पुस्तकात लेखिकेने अत्यंत उत्तमपणे इस्रायल चे दहशतवाद विरोधी धोरण कसे आहे व मोसाद ची कार्यशैली याविषयी सांगितले आहे . 

त्याशिवाय पूर्वी मी ना ह पालकर लिखित " छळाकडून बळाकडे " हे पुस्तक ही वाचले होते . 

शत्रूला कुठलीही दया न दाखवता त्याला ठारच केले पाहिजे हीच इस्रायलची पॉलिसी आहे (Zero Tolerance Policy )त्यामुळेच सगळ्या बाजूंनी शत्रू राष्ट्रांनी वेढलेले असूनही हे राष्ट्र दिमाखात प्रगती करत आहे . शिवाय शत्रू भविष्यात आपल्या विरोधात  काय करू शकते हे आधीच शोधून , शत्रूचे हे कारस्थान देखील  उध्वस्त करणे हे ही इस्रायलला उत्तम जमते . जसे त्यांनी इराण व सीरियाचा होऊ घातलेले अणुभट्टी उभारणीचे प्रकल्प थेट बॉम्ब वर्षाव करून उध्वस्त केले . 

जर्मनीत झालेल्या ऑलिंपिक स्पर्धेच्या वेळी इस्रायलच्या खेळाडूंचे अपहरण करून त्यांची हत्या करण्यात आली . त्यावेळी या हत्या प्रकरणात सहभागी असलेल्या  प्रत्येक दहशतवाद्याचा सतत वीस वर्षे  जगाच्या कानाकोपऱ्यात शोध घेत ,मोसाद ने ही त्यांची ही हत्या करत बदला घेतला ..हे वाचून आपणही स्तिमित होतो .

दुसऱ्या महायुध्दात हिटलरचा सहकारी असलेला आईकमान हा ज्यूंचा क्रमांक एकचा शत्रू होता . त्यानेच लाखो ज्यूंना गॅस चेंबर कडे घेऊन जात, त्यांच्या अतिशय क्रूर हत्या केल्या होत्या . महायुद्ध संपून अनेक वर्षे होऊनही ज्यू व इस्रायल त्याला विसरले नाही . मोसाद ने त्याचा शोध घेतला , त्याला पकडून आपल्या देशात आणून ,त्याच्यावर रीतसर खटला चालविण्यात आला व त्याला  फाशीची शिक्षा दिली . ही अशी काळजाचा थरकाप उडवणारी गोष्ट ऐकून आपण मनोमन इस्रायलच्या  शुर कमांडो सैनिकांना सलाम करतो .

आपल्याला जे हवे आहे  ते घडवून आणताना ते अगदी नैसर्गिक वा सहज वाटले पाहिजे , अशा प्रकारे घटना घडवून आणणे ही मोसाद ची कार्य पद्धती अतिशय अद्भुत अशी आहे . 

मिग् -२१ विमान ही एकेकाळी फक्त रशियाची मक्तेदारी होती . हे विमान त्याकाळातील सर्वात श्रेष्ठ असे युद्धातील विमान होते . हे असे विमान रशियाने इराकला दिले , पण अमेरिका वा इस्रायल यांना कधीच दिले नव्हते . मग  इस्रायलने जगाला अशक्य वाटेल असे " ऑपरेशन डायमंड " राबवले . या ऑपरेशन मध्ये इस्रायलने एक पूर्ण  विमान इराक मधून पळवून इस्रायलला कसे आणले , हे जाणून घेणे  खरेच थरारक आहे . रहस्य कथा लेखकांना देखील ज्या कल्पना कदाचित सुचणार नाही, ते मोसाद व इस्रायलने करून दाखवले  . पुढे जाऊन मग इस्रायलने हे मिग २१ चे  तंत्रज्ञान अमेरिकेलाही काही इतर गोष्टींचा मोबदला घेऊन विकले .

इस्लाम धर्म अतिशय वेगाने पूर्ण जगात आपले हातपाय पसरत आहेत .भल्या बुर्या अशा सगळ्याच मार्गांनी पसरत आहे . अशावेळी या सगळ्या अरब मुस्लिम  राष्ट्रांना पुरून उरणारा व त्यांना एकाच वेळी युद्धात हरवणारा  इस्रायल सगळ्या जगाचे लक्ष वेधून घेणारा ठरला आहे .

सावरकर म्हणत त्याप्रमाणे " राष्ट्राच्या सीमा चरख्याच्या सुताने  नव्हे , तर तलवारीच्या टोकाने आखायच्या असतात "  हे वाक्य इस्रायल ने अक्षरशः खरे करून दाखवले आहे . त्यांच्याकडे वाकड्या नजरेने बघायला मोठमोठी राष्ट्रे आज घाबरतात , त्याचे कारण त्यांची शस्त्र सज्जता व  दिवसेंदिवस वाढत असलेली  त्यांची तंत्रज्ञानातील झेप !.

अजून एक थरारक प्रकरण !  विमान अपहरणाचे  हे प्रकरण तर पूर्ण जगभर गाजले होते . २७ जुन १९७६ रोजी अथेन्स येथून चार अतिरेक्यांनी इस्रायली प्रवासी असलेल्या एअर फ्रान्स फ्लाईट -१३९ या विमानाचे अपहरण केले . पुढे हे विमान युगांडा येथील ऐंटेबी येथे उतरविण्यात आले . युगांडाचा हुकूमशहा ईदी अमीन हा अतिरेक्यांना सामील झाला होता . दुसऱ्या देशाच्या भूमीवर आपली विमाने उतरवून ,इस्रायली कमांडो सैनिकांनी कशा प्रकारे सगळ्याच प्रवाशांची जिवंतपणी सुटका केली असे हे' ऐंटेबी ऑपरेशन ' मुळातून वाचण्यासारखे आहे . अशा प्रकारे त्या आधी ही कुठल्याही देशाला हे जमले नव्हते व कदाचित त्यानंतर ही कुणाला जमलेले नाही .

ज्यू धर्म हा २५०० पेक्षा जास्त वर्षे जुना धर्म आहे . काही शतकांपूर्वी त्यांना त्यांच्या मूळ भूमीवरून हाकलण्यात आले . दुसऱ्या महायुध्दात ज्यू लोकांनी ब्रिटन व अमेरिकेला खूप मोठ्या प्रमाणात आर्थिक मदत केली. त्याचवेळी ज्यू लोकांनी आपले स्वतःचे स्वतंत्र राष्ट्र असावे अशी मागणी जोराने रेटली . त्याचाच परिपाक म्हणजे ब्रिटिशांनी पॅलेस्टाईन ची फाळणी करून इस्रायल नावाचे राष्ट्र ज्यूंना बहाल केले . हे घडले १९४८ साली . त्या  वेळी मोठ्या प्रमाणात जगभरातून ज्यू लोकांनी इस्रायल मध्ये यायला सुरुवात केली . याच क्षणापासून चहूबाजूंनी शत्रू राष्ट्रांनी वेढलेले इस्रायल हे सतत युद्धमय राष्ट्र झाले आहे . तरीही येथल्या लोकांचे राष्ट्रप्रेम , प्रत्येक घरात लष्करी शिक्षण यामुळे हा देश आजच्या घडीला खूप मजबूत झाला आहे . मला येथे छत्रपती शिवाजी महाराज यांनी स्थापन केलेल्या स्वराज्याची आठवण होते आहे . कारण छत्रपती शिवाजी महाराज व धर्मवीर संभाजी यांच्या मृत्यूनंतर ही स्वराज्य का व कसे टिकले हे जर आज कुणाला  समजून घ्यायचे असेल तर इस्रायल चे ताजे उदाहरण आपल्या समोर आहे . कारण क्रूर औरंग्या जेव्हा लक्षावधी मुघल सैन्य घेऊन स्वराज्य जिंकू पाहत होता (१६८१ ते १७०७) , तेव्हा मराठ्यांच्या घरात प्रत्येक जण सैनिक झाला होता . अगदी घराघरातील महिला ही शस्त्र चालवणे जाणत होत्या , म्हणूनच स्वराज्य टिकले व पुढे चहू दिशांना वाढतच गेले .

 इस्रायल चे जगात कुठलेही नामोनिशाण ही नव्हते ,तेव्हा त्या काळात भारतातील दूरदृष्टी असणारे नेते वीर सावरकर यांनी इस्रायल बद्दल काय सांगितले होते ते पहा, 

 *इस्रायल आणि स्वातंत्र्यवीर सावरकर* 

यहुदी वा ज्यू लोकांनी पॅलेस्टाईन मध्ये स्वतःचे स्वतंत्र राष्ट्र निर्माण करणे यासाठी सावरकरांचा पूर्ण पाठिंबा होता . ज्यू स्वतःचे राष्ट्र निर्माण करतील हे त्यांनी खूप आधीच सांगितले होते (साल  १९२१ - हिंदुत्व  या पुस्तकात) 

याचवेळी नेहरू व त्यांचे सरकार या ज्यू राष्ट्राला विरोध करत होते व  अनेक बलाढ्य राष्ट्रे ( अमेरिका , ब्रिटन आदी ) इस्रायल निर्मितीस  पाठिंबा देत होते .त्यामुळे या बलाढ्य राष्ट्रांचा रोष ओढवून घेण्याचा धोका निर्माण झाला . या चुकीच्या व हास्यास्पद  परराष्ट्रीय धोरणाला सावरकरांनी विरोध केला . 

त्याचवेळी  हेच बलिष्ठ ज्यू राष्ट्र  आक्रमक आघाडी निर्माण करणाऱ्या मुस्लिम गटांना ( अरब राष्ट्रे ) यांना समर्थ प्रतिकार करण्याचे काम करेल , असे द्रष्टे सावरकर सांगतात . 

ते नमूद करतात की भारताने इस्रायल ला पाठींबा देणे हे भारताच्या हिताचे आहे "

दहशतवादाच्या विरोधात कसे लढले पाहिजे , याचे उत्तम उदाहरण इस्रायल ने जगापुढे कायम घालून दिले आहे . आजही हमास या क्रूर दहशतवादी संघटनेने सुरू केलेले हे युद्ध , इस्रायल नक्कीच हमासचा पूर्ण नायनाट करूनच  संपवेल याची खात्री वाटते . 

एकूणच आजही दहशतवाद विरोधी लढणाऱ्या इस्रायलला केवळ भारतानेच नाही , तर जगातील सर्व राष्ट्रांनी एकमुखाने पाठींबा देऊन हा दहशतवाद रुपी राक्षस कायमचा गाडला पाहिजे . 

© हेमंत सदाशिव सांबरे.

दिनांक - २९.१०.२०२३ .